Kári Nielsen og Birgir Hansen settir at menna barna- og ungdómshondbóltin á Argjum

Fáir venjarar hava sett so týðilig fingramerki á føroyskan hondbólt sum Kári Nielsen og Birgir Hansen. Fyrrverandi landsliðsvenjararnir hava gjøgnum nógv ár verið við til at menna leikarar, venjarar og feløg í Føroyum, og nú hava teir tikið av avbjóðingini at leggja lunnar undir næsta ættarliðið av leikarum og venjarum í ÍA.

ÍA hevur seinastu árini verið í støðugari menning. Bara seinasta kappingarár vaks talið av kappingarliðum í aldursbólkunum U9-U14 við umleið 60 prosentum.

Hóast vit fegnast um stóra vøksturin, setur hetta samstundis størri krøv til felagið. Tess fleiri børn og ung velja hondbóltin og ÍA, tess størri tørvur er á dygdargóðari venjing, sterkum venjaraumhvørvi og einum greiðum reyðum tráði tvørtur um árgangirnar. Somuleiðis er týdningarmikið at varðveita og menna tann sterka felagsskapin, sum tryggjar trivnað, menning og hondbóltsgleði hjá øllum.

Tí fegnast vit um at at hava sett Kára Nielsen og Birgir Hansen sum høvuðs barna- og ungdómsmennarar, har teir vera við til at tryggja, at vøksturin verður fylgdur upp við dygd, trivnaði og langsiktaðari menning.

Samstundis eru Kári og Birgir settir sum høvuðsvenjarar hjá D14, har teir fáa ábyrgdina av at skipa og menna venjingarnar hjá hesum aldursbólki.

Setanin av Kára og Birgiri er ein týðandi liður í langsiktaðu ætlanini hjá ÍA um at leggja sterkar lunnar undir framtíðina og byggja eitt sterkt og dygdargott hondbóltsumhvørvi á Argjum. Málið er at tryggja, at øll børn og ung í felagnum fáa bestu møguleikar at mennast og trívast – bæði sum hondbóltsspælarar og sum partur av einum sterkum felagsskapi.

Vit ynskja Kára og Birgiri hjartaliga vælkomnum í ÍA og gleða okkum til samstarvið.